Mer kind nadierlich aach saan, wammer schunn voröschderlich gestimmt iss, doo leid de Haas im Peffer. Das werrd sich dann e bissje abbediddlicher aanheere.
Awwer in der Zeidung war halt so e scheenes, ergreifendes Bild abgedruggd. Wo e älderi Fraa wehmiedisch vunn ihrem geliebde Bello Abschied nemmt. Das Ganze war allerdings nur desweeje e Schlaachzeil wert, weil das garnidd in echt passiert iss. Es war nämlich e Szene aus dem naachelneije Tatort, denne wo se graad am drääje sinn. Unn de Ort des Geschehens war juschdament die Ald Schmelz in Dengmerd.

De Arwedds-Tiddel vunn dem Krimi hääschd „Fleisisches Lieschen“. Was joo irjendwie nidd schlecht zu der hisdoorische Lokalitääd passe werrd. Während doo nämlich friejer die Männer uff der Schmelz geschaffd, beziejungsweis geschuffd hann, hann dehemm die Fraue sich misse krummleeje, dasse de Haushalt fier die Famillje in Ordnung gehall hann. E geschichdlichi Tatsach, wo mer gääre mool hadd unner de Disch falle losse. Ich bin jedds nur mool gespannt, was fier e kloor Story sich hinner dem Titel versteggeld. Unn wie sich die nei Tatort-Belegschaffd draanstelle duud.
Iwwrischens hadd kurz vorher aach in der Zeidung gestann, dasse in der Näh vunn Sengscheid e richdischer Grabhiwwel entdeggd hann. Unn zwar aus der Eisenzeit, also vunn vor iwwer zweiehalb Dausend Johr. Knoche hannse käämeh gefunn. Awwer falls es sich doo ewenduell aach um e Tatort gehannelt hann sollt, iss der Fall sowieso schon längschd verjährt.