Weil de Mensche das geeje de Strich geht, dassmer die garnidd richdisch greife kann. Manche machd das so grimnmelwiedisch, dasse niggs eilischeres se duun hann wie die Zeid doodseschlaan. Am leddschde Sunndaach hammer sogar widder erlääwe misse, dasse uns e ganzi Stunn schdibizzd hann. Dassmer die imme halwe Johr noch emool serigg grien iss momentan nur e schwacher Trooschd. Awwer die Tatssach duud joo dann eichendlich der ald Weishääd widerspreche, dassmer die Uhr nidd serigg drääje kann. Mer sied, es iss alles e bissje misteriöös.
Unn desweeje sinn schlaue Leid schunn uff de Trichder kumm, dass die Zeid relatief iss. Awwer doodezu brache mer gar kää Nobelpreis-Träächer, das kenne mer schunn ausem normale Lääwe, dass die Zeid e ziemlich dehnbarer Begriff iss. Achd Daach Urlaub iss ebbes Scheenes. Awwer wammer achd Daach midd Gribb im Bedd leid, fangd mer aan se stehne: Das ziehd sich!
E beliebdes Thema iss aach die vergangene Zeid, die Hissdoorieje. Wo mer sich midd Hinnerlassenschaffde vunn unser Vorfahre beschäffdische duud. Awwer jedds gebbds aach es Geejestigg dezu: die Zeidkabbsel. Wo mer Doggumende vunn heid eninnsteggd, wo mer dann bis ultimo unner Verschluss halt. Unn erschd unser Enkel duun die dann widder auskraame. Die Uni in Saarbrigge hadd graad dezu uffgeforderd, dass mer e „Brief an die Zukunft“ schreibt. Es werrd aach kää Pordo koschde.