Mundart-Kolumne für St. Ingbert Was emm so alles bliehd

De Januar hammer jedds gligglich erumkried, unn das iss doch schunn mool e Fordschridd. Der Monaad iss erfahrungsgemääs de langweilischde im ganze Johr unn middem Eddikedd „läbbsch“ noch gudd bediend.

Mundart-Kolumne Die Atzel für St. Ingbert
Foto: SZ/Müller, Astrid

Es iss nix groos los, auser dass die Leid ringsrumm huuschde unn schniefe. Also wann bei Ihne turnusmääsisch die Fregg aanstehd, holle se sich die am beschde in der Zeid. Doo gehds in äänem Uffwasch.

Normalerweis iss de Januar staddisdisch gesiehn aach de käldeschde Monaad. Awwer vor allem am Johresaanfang hadd mer doodevunn nidd vill gemerkt. Nidd dassmer desweeje besonnerschd traurisch wär. Vor allem wammer an die Rechnung fiers Heize denkd. Im Gaarde hann schunn vorschnell die Veschelcher gezwiddscherd unn ware dann ganz worres, weil se doch widder kalde Fies kried hann. Unn ich hann gelääs, dass sogar schunn einische Biencher midd ihrem Zeidgefiehl dorjenanner kumm sinn unn vorwiddsisch ausgeschwämd sinn. Unn das wär fier die Imker kää Hoonischschlegge, weil die jedds uffpasse misse, dass ihr Völker ebbes se fuddere krien. Die Haselnusssträucher hann zwar aach schunn auserplanmääsisch gebliehd, awwer doodevunn werre die wahrscheins nidd sadd. Iwwrischens, wo mer graad vumm Blieje unn vumm Friehlingserwache schwäddse, doo gebbds näägschd Woch am Freidaach e lohnendi Veraanschdaldung fier all, woos jedds schunn im griene Daume juggd. Im Foyer vunn der Dengmerder Stadtbiecherei stehd noch emool die Saatgutbörse uffem Programm. Doo kammer es sesammegeschnerrde Aangebodd an immer de gleiche Sorde mool e bissje aanreichere. Midd Pflanzesame aus alde Züchdunge, wo heid faschd vergess sinn. Es misse joo nidd nur immer die Haarde in de Gaarde kumme.

Meistgelesen
Neueste Artikel
Zum Thema
Aus dem Ressort