Zum Beispiel de Beckerchor, der wo allerdings erschd die näägschd Woch draan iss. Weils zu dem Ambiende, wo das Ganze staddfind, ziemlich de Bersch enuff gehd, kammer das Ereischnis joo gewissermaase als Hochkuldur bezeichne.

Die Klangkerpere, wo dort uffträäde, sinn zum greeschde Dääl Lokalmatadoore, also Musigger aus nääjerer Umgebung unn eichener Uffzuchd. Unn de Musikverein aus Rohrbach machd heid Oowend gleich de Ufftaggd. An dem Ausdrugg kammer iwwrischens aach scheen demonschdriere, wie Musikalisches in unserer Alldaachssprooch sei Spure hinnerloss hadd. Wann also jedds jemand die Veraanschdalder, unn hinnerher aach noch die Middwirkende, in de heegschde Töön loowe werrd, dann saan die bestimmd: Ei, das iss doch Musigg in unsere Ohre. Odder vielleichd aach noch: Ich kinnd demm stunnelang zuheere. Wann allerdings im Orcheschder, – ich wills nidd verschreije – ääner mool ausem Taggd kumme solld, dann kannsem passiere, dass er vumm Dirigent de Marsch gebloos kried. Unn in unserer Wettbewerbs- unn Ellebooe-Gesellschaffd gebbds uff der ään Seid ganz vill, wo ausem leddschde Loch peife. Unn die annere, wo tonangebend sinn. Uff die sinn dann all die neidisch, wo aach mool gääre die eerschd Gei gespield hädde. Awwer die grien dann gesaad, sie solle sich nidd so uffspiele, es Lääwe wäär kää Wunschkonzerd.