Ich will doodemidd nadierlich nidd saan, mer solld geeje Kernsääf e Awersioon endwiggele. Unn wann es Brauchwasser sich in Abwasser verwanneld, duunse das joo dann aach in geordnede Bahne, beziejungsweis Rohre leide. Awwer doo simmer schunn beim Kern vumme unabbediddliche Problem, was in leddschder Zeit zimmlich Sorje machd. Dass die Ensorjung vunn Gebrauchdem manchmool nidd so ordentlich vunnstadde geht, wie mer sich das winsche werrd. Mer schwäddsd dann vumm sogenennde wildem Müll. Weil doo gewisse Wildwuddse ihr Mist in der freije Naduur ablade.

Awwer das iss joo eichendlich ungerechd geejeiwwer de Wuddse. Weil die nämlich ziemlich reinliche Viecher sinn. Unn es iss aach ziemlich rufschäädischend fier uns Veschel, wammer immer vunn Dreggschbaddse unn Schmuddsfinke schwäddsd. Das bringt die ganz Sibbschaffd in Verruf. Sie merke, iwwer so ebbes kinnd ich mich uffreesche. Awwer beim Thema illegaler Abfall kommt mer eewe nidd drummerum, dass mer sich iwwer die Urheber abfällisch äussere duud. Awwer jedds kummt langsam Beweechung in die Sach, indem dasse iwwerleeje wie mer dem Iwwel Herr werre kann. Es gebbd sogar e extra App, wo mer so illegale Ablaacherunge melle kann. Unn wo dann meeschlichst schnell beseidischd werre, bevor dasse noch meh zum Himmel stinke. Unn das mer die erschd garnidd brauchd, doodefier gebbds im März dann e neiji Ufflaach vunn der Sammelaktion „Picobello“.