Mundart-Kolumne für St.Ingbert Gelangweild in der Feeriejewohnung
Mer lääsd joo effder devunn, dass schlaue Leid sich unners Volk mische, fier dem sei Aansichde iwwer die Probleme eraussefinne, wo uns heidsedaach unner de Nächel brenne. Unn die Ergebnisse duun die dann staddisdisch bis uff zwää Stelle hinnerm Komma stolz verkinde.
Manchmool frood mer sich awwer schunn, wie die ihr tiefschürfende Erkenntnisse iwwerhaupt so ermiddeld hann.
Von mir hadd jedenfalls noch känner wolle die Määnung heere. Also so ganz offiziell unn zum Middschreiwe. Vielleichd hadder aach Angschd gehadd, ich häddse dem gladd ins Gesichd gesaad. Awwer das kummd vielleichd noch, dass mir änner e Mikro vors Gesichd halld unn frood: Was halle Sie als Aussenstehender vunn Intelligendds?
Annererseids gebbds joo Fäll, wo de ganze Uffwand eichendlich unneedisch wär. Weil emm doo de gesunde Menscheverstand schunn saad, wie die Sach gelaacherd iss. Dass zum Beischbiel 70 Prozend vunn de Berufstäädische aach im Urlaub dienschdlich erreichbar sinn, das häddmer sich faschd kinne denke. Wobei joo noch garnidd sicher iss, ob mer bei der derzeidisch Wedderlaache iwwerhaubd vunn Urlaub im eischendliche Sinn schwäddse kann.
Unn wanns dann so scheeen plääschderd unn mer huggd in der Feeriejewohnung unn langweild sich, doo iss mer doch froh wann emm ausem Betrieb odder emm Birro jemand aanruufd odder e Email schiggd. Ganz Eifrische die ruufe vunn selwer aan, unn erkunnische sich, wie de Betrieb so laafd. Weil se erhebliche Zweifel hann, dass die Kolleesche ohne sie iwwerhaupt klar kumme.
Vielleicht sollde dies weenischdens im Urlaub mool middme Aanrufbeandworder versuche: „Sie rufe außerhalb vunn meiner Arweddszeid aan. Uff Grund vunn Entschleunischung kannes zu mehrtägische Verzööcherunge kumme.“
