Mundart-Kolumne für St. Ingbert Gudd nass gemachd
Die allererschd Hiddsewell hammer joo am leddschde Woche-Enn meh odder weenischer gligglich hinner uns gebrung. Was e ziemlichi Achderbahnfahrt war, noo denne gefiehld herbstliche Temberaduure, wo hie Ende Mai geherrschd hann.
Unn hinnerher isses Thermomeeder dann aach prompt widder abgesaggd. So ebbes schlauchd nidd nur die, woo middem Kreislauf se duun hann. Doo lossd aach die Naduur gääre mool die Fliddche hänge. Desweeje hannse sich awwer hie fier die städdische Bääm e raffinierder Trigg infalle geloss. Bevor die Seddslinge ganz verdroggele. Midd so Bewässerungs-Sägg, wo um das Bäämche erumgebunn werre. Unn dann duud es koschdbare Nass aus denne ganz langsam dorthin dribbse, wos so dringend gebraucht werrd.
Iwwerhaupt soll de Mensch sich joo aach, wanner im Summer ins Schwiddse kummt, meeschlichst groose Menge an Flissischkääde zufiehre . Unn sich ausbiegisch die Kehl anfeichte, dasser nidd am Enn noch zum Droggeschbuddser werrd. Wobei die Gedränke awwer sicherheitshalwer meeschlichst algehoolfrei sinn sollde. Ään Ereischnis wär allerdings de gegebene Aanlass fier das se begiese. Es Hallebad im Blau hadd widder uffgemacht unn mer kann sich – wammer de TÜV (Test iwwer Virefreihääd) – hinner sich hadd, endlich in die Fluude sterze. Noch scheener wärs nadierlich gewään, wann es frisch renowierde Freibad nääwedraan aach schunn uff hädd.
Awwer doo sinnse noch emsisch am Schaffe. Desweeje hannses midd dem anvisierde Termin fier die Eröffnung aach noch nidd ganz geschaffd. Awwer wer wääs, vielleicht klabbds joo bis zu de Ferieje. Wasser iss jedenfalls genuch doo, das hannse nämlich schunn mool freundlicherweis ins Begge ingeloss. Doo kann de Summer joo kumme.
