Awwer ehrlich, das war doch e verlängerder April unn eejer e Wannemoonad wie e Wonnemoonad. Friejer hadd am erschde Mai als es Freibad uffgemachd unn jedds haddmer misse die Heizung uffdrääje unn im Wedderberichd heere: „Am Temperaturniveau ändert sich nichts“. Also Niveau siehd annerschd aus!
So ebbes kann emm richdisch die Stimmung verhagele unn mer kann doodebei richdisch in Raasch kumme. Obwohl joo ääni vunn de fundamendaalschde Lääwensweishääde besaad, dass mer sich nidd aach noch iwwers Wedder uffreesche soll.
Es äänzisch Gudde an der Sach iss joo, dass mer endlich mool e annners Thema gehadd had wie das eewische – sie wisse schunn was ich menn. Unn die Landwerde freije sich iwwer so e Wedder, weils joo in rer ald Bauernreeschel hääschd: Ist der Mai kühl und nass, füllt‘s dem Bauern Scheun‘ und Fass. Rään iss eewe gudd fier die Naduur. Awwer wie mei Freind Schorsch schunn immer gesaad hadd: dann kind die Naduur joo aach endlich mool ebbes fier mich mache.

Das erinnerd dann schwäär an denne Spruch: All schwäddse se vumm Wedder. Awwer känner macht ebbes degeeje.
Doo iss insofern ebbes Wohres draan, indemm dass die Ausredd, mir kinnde doch nix draan ännere, heid nimmeh so richdisch zieht. Weil es Wedder als solches joo nidd unerheblich vumm generelle Klima abhängd.
Unn zugunschde vunn dem Klima gebbds in Dengmerd die näägschde 3 Woche widder die Aggzioon Stadtradeln. Wann doo meeschlichst vill middmache, dann klabbds dann aach widder middem Wedder.