Mundart-Kolumne für St. Ingbert E ganz grooses Rad gedräähd
Sie hann in Dengmerd widder mool e digger Fisch an Land gezoh. Middme renommierde Hersteller vunn Eleggdro-Fahrräder, wo hie uff em Kleber-Gelände bis näägschd Johr e ganz neiji Fabrigg hochzieje will.
Amtlich laafe so Zweiräder unner der Bezeichnung „Fahrrad mit Hilfsmotor“ unn uff Denglish unner E-Bike. Die stromliniefermische technische Wunnerwerke sinn zur Zeit jschwäär in Mode. Mer kinnd faschd saan, der Trend entwiggeld sich langsam zu rer Massebeweeschung. Wobei de Widds bei dem Gerät joo graad doodrin besteht, dassmer sei Masse garnimmeh selwer beweeje muss. Weil der Modoor emm es läschdische Strammbele abnemmt. Was besonnerschd niddslich iss, wammer in unserm leicht hügliche Dengmerd mool schnell midd Karacho de Bersch enuff fahre will.
Sellemools war amme Rad noch e Schuddsblech draan unn an de Buxe e Fahrradspang. Unn es hadd im Volksmund uff de scheene Noome Drohd-Esel geheerd. Wenn jedds noch e eleggdrischer Aanschub draan kummt, dann geht das Ding awwer ab wie Schmidts Katz, egal wie steil die Stroos iss.
Doodebei fallt mir uff, wie gääre Fahrzeuche midd Tiernoome beleed werre. Vor allem bei unserm beschde Stigg, em Audo, sinn Spiddsnoome schwäär beliebt. Weil doo es Verhäldnis vunn Besiddser unn Unnersadds e besonnerschd innisches iss. Das fangt schunn bei de sogenennde Päärdestärke, de Pee-Ess, an. Wo bezeichnenderweis unner der Haube hugge. Faschd so als wäre se middenanner verheiraad. Es Audo selwer hadd so Titel wie Jaguar odder, am annere Enn vunn de Aanschaffungskoschde, die legendär Ente. Wo eejer gemiedlich durch die Stroose getuggerd iss. Am bekanndeschde war awwer de unverwüschdliche Käfer. Der iss gelaaf unn gelaaaf…
