Mundart-Kolumne für St. Ingbert Awwer scheen iss annerschd

Iwwer Geschmagg lossd sich joo bekanndlich ganz prima streide. Allään schunn beim Esse, das wo mer vorgeseddsd kried, duun die Reagzioone schwanke zwische spiddsemääsisch unn igitt-igitt. Awwer wies schunn in dem Sprichwort hääschd: Was de Bauer nidd kennt, das fressder nidd.

Mundart-Kolumne Die Atzel für St. Ingbert
Foto: Die Atzel

Wobei sich bei der Ernährung mittlerweile die Diskussion vunn de Geschmaggsnerve eejer uff de Nährwert unn die Inhaltsstoffe verlaacherd hadd.

Wo mer sich awwer uff besunnerschd gliddschisches Parkedd begebbd, das iss joo bei de kinschdlerische Produggde. Es sinn joo immer die annere, iwwer die wo mer de Kobb schiddele muss, was die so alles scheen finne. Awwer graad der Ausdrugg „scheen“ iss e aarisch dehnbarer Begriff. Unn in de meischde Fäll das, was emm selwer am beschde gefalld. Wobei dann awwer, wann ebbes als „gefällisch“ tituliert werrd, das in de gehobene Kunschdkreise nidd unbedingt e Gütesiechel iss. Bei de richdische Kunschdwerke, also denne wo effendlich an der Wand hänge, soll mer joo aach garnidd so nah draan gehn unn genau hingugge. Obwohl de Busch sellemools geschrieb hadd: „Und bei näherer Betrachtung, steigt mit dem Preise auch die Achtung.“

Mei Freind Schorsch, der wo sich aus mir unerfindliche Gründe selwer fier e Kunschdkenner halt, duud sich verhement degeeje wehre, dass ihm jemand anneres äänfach so vorschreiwe will, was ihm gefällischd se gefalle hädd. Ei das wär joo noch scheener! Unn dann hadder mir das Ganze noch philosophisch vergliggere wolle. Die Scheenhääd werrd nämlich im Au vumm Betrachder leije. Ach so, hann ich gesaad, doo duuschd du garnidd an Geschmaggsverirrung leide. Du haschds bloos midd de Aue. Doo warer dann schwäär beleidischd.

Meistgelesen
Neueste Artikel
Zum Thema
Aus dem Ressort