Was soll mer awwer aach schunn groos erwaarde, wann de uffmunderndschde Spruch, wo emm awweile zum Beispiel ausem Fernsehn entgeejeschalld, e herzhaffdes „Bleiben Sie negativ!“ iss. Das kummd dann eejer de Pessimischde entgeeje, wo noo dem Wahlspruch lääwe: Ich loss mir doch mei schlechdi Laune nidd vermiese.
Die üblich Diskussion, ob es Glas jedds halb voll odder halb läär iss, helfd emm aach nidd weider. Weils aggduell meischdens um Reagenzgläser geht. Awwer dass mer desweeje gleich zur Flasch greift, wäär naddierlich nidd unbedingt e optimaali Schdrategie.
Aach sunschd gebbds herzlisch weenisch, was emm e bissje uffbaut. Mer hann joo erschd neilich extra e Stunn vunn unsrer wertvolle Zeid geopfert, dasse die Uhr uff Summerzeit hann kinne umstelle. Awwer hadds ebbes geniddsd? Weit unn breit iss noch kää richdischer Sommer in Sicht.
Doo kummts dann graad zur rechde Zeit, dass am Sunndaach de Daach des Baumes gefeiert werrd. Unn aus dem Aanlass duun in Rohrbach am Haus vunn de Kahleberschfreunde einische prominende Perseenlichkääde e paar Bäämcher planze. Was joo sinnvoll unn zimmlisch simbolträschdisch iss. So Bääm in hoffnungsgrien kinne nämlich angeblich unser aarisch gebeudeldes Gemied widder e bissje uffrichde. Unn bis die Exemplare dann nooher richdisch ausgewachs sinn, hammer hoffendlich aach die doo Krise gligglich hinner uns gebrung. In dem Sinn kammer dann nur saan: Klobb uff Holz!