Das Ganze geht ziemlich flodd un problemlos iwwer die Biehn, aach wanns e bissje in der Noos kiddseld. Was mich als Kollummnischd dodebei aawer in der Fedder juckt, das iss es fremdsprochliche Vokabular, wo sich doo um die Prozeduur ranke duud. Dass es Wort Test ausem Englische kummt, das falld emm faschd schunn garnimmeh uff unn iss gewissermaase schunn inngemeinded. Unn der Ausdrugg Drive-in geherd joo aach schunn zur umgangssprochliche Grundausstaddung, wammer heidsedaachs „in“ sinn will. Awwer jedds hadd doo sogar gestann, dass so e Schnelltest aach midd „Walk-In“ meeschlich wäär. Mei Freind Schorsch war desweeje ziemlich worres. Er hadd schunn gemennd, dasser doo vielleicht durchgewalkt werrd. Awwer Schorsch, hann ich gesaad, das Walke, das kenschde doch vunn de Leid, wo midd denne Stegge durch die Landschaffd peese. Unn das hääschd nix anneres als wie dassde doo se Fuus äänfach eninngehn kannschd.

Ach, du mennschd per pedes, hadder doo gesaad. Genau, awwer die Zeide, wo du midd deinem kliddseklääne Laddinum noch strunze kannschd, die sinn längschd vorbei. Am beschde guggschde mool ins Programmheffd vunn der Volkshochschul unn suchschder e scheener Englischkurs aus. Doo werrd zum Beipiel ääner angebodd unner dem Titel „English to go“. Unn do kammer dann hingehn? Nää, eewe nidd. Das iss e Webinar unn geht nur online.