Mundart-Kolumne für St. Ingbert Dengmerder Stadtgeschichde

Was macht mer, wammer permanennd dehemm huggd, weil nirjends meh ebbes los iss. Ich menn jedds garnidd es ungezügelde Nachtlääwe, meh so die kuldurelle unn gesellschaffdliche Treffpunkte. Mer kann joo in seinem notgedrungene Stuwwe-Arrest nidd immer nur uff de Fernseher unn annere Bildschirme starre.

Mundart-Kolumne Die Atzel für St. Ingbert
Foto: Die Atzel

Manche nuddse joo die Zeit unn saan sich, wanns sowieso schunn so langweilisch iss, doo kinnd ich mich joo graddselääds mool um mei ganzer Babierkram kimmere, der wo sonschd im pralle Lääwe immer bis uff de leddschde Drigger leije bleibt.
Unbezahlde Rechnunge, die 250 Dausend Bilder ausem Urlaub vun vor 2 Johr unn all die Unnerlaache, wo mer irjendwann mool dringend gebrauche kinnd. Unn die wo jedds in die unmeeschlichsde Ablaache erumm vagabundiere, wo mer se dann garandierd nidd finnd.
Ganz vill alde Doggumende sinn joo im Dengmerder Stadtarchiv im wahrschden Sinn des Wordes gebungerd. Allerdings ordendlich katalogisiert unn desweeje aach gudd se finne, wammer mool uff die seriggreife will. De Herr Wirth, wo dort 27 Johr lang gewirkt hadd, iss im voorische Johr in de Ruhestand gang. Die neije Leiderin, Frau Dr. Ertle, hadd schunn es Johr 2024 im Bligg. Wo es fuffzischjährische Jubiläum vunn der Gebietsreform aansteht. Was bei de Rohrbacher eejer unner „Dengmerder Ost-Erweiderung“ firmiert.
2029 iss dann fier die Dengmerder e ganz rundes Datum. Weil der Gemeinde vor 200 Johr die Stadtrechte verlieh worr sinn. Sellemools noch unnerm bayrische Keenisch, emm erschde Ludwig. Das iss dann de Anlass, fier die Stadtgeschichd nomool genauer unner die Lupe se nemme unn nei se sordiere. Unn wer zu dem Thema ebbes beisedraan hadd, der kann sich beim Archiv melle.

Meistgelesen
Neueste Artikel
Zum Thema
Kenn Bock meh
Mundart-Kolumne von Günther Hussong Kenn Bock meh
Aus dem Ressort