Unn dann kumme zu allem Iwwerfluss aach noch die ganze traurische Feijerdaache. Wobei ich nidd de 11.11. in der näägschd Wuch menne. Der wo diesmool sicher aach kää Frohsinn verbreide duud. Es steht joo aach schunn de Winder-Bluus paraad, fier emm gemiedsmääsisch ins Sudderräng se beferdere. Es iss e bissje vill, was doo sesammekummt. Awwer ich saan mir, was solls, doo gehts dann in äänem Uffwasch.

Als Kollummnischd sucht mer joo verzweifeld noo ebbes, wo mer die hängende Mundwingel eventuell e bissje hochzieje kinnd. Awwer im Endeffeggd isses dann doch nur die eichne Nas, wo mer hochzieht. Ach so, das hädd ich bei dem Lamento beinäägschd vergess: Schnubbezeit iss joo aach noch. Unn jedds sinn ausgerechend all Werdschaffde zu. Was schunn fier die Werrde e middleri Kaddaschdroof iss. Unn em Gaschd, wo noch nidd mool still in sei Bier eninnweine kann, bleibt eichendlich nur die innere Einkehr. Die hadd zum Gligg kää Sperrstunn.

Ich hann mir als iwwerleed, wie ich e bissje Farb in mei ausgebremsder Alldaach bringe kinnd. Unn doo hann ich in dem neije Weisgerber-Kalenner geblädderd. Midd denne herrlich bunde, lääwensluschdische Gemälde drin. Middrer Prozession, middme Sängerfeschd unn middme Jahrmarkt. Wo sich die Leid ganz dicht gedrängt hann. Himmel unn Mensche sosesaan. Das wirkt heid faschd wie e exoodischi Szenerie aus vergangene Daache.