1. Saarland
  2. Saarpfalz-Kreis
  3. St. Ingbert

Mundart-Kolumne Die Atzel für St. Ingbert

Mundart-Kolumne für St. Ingbert : Vunn der Hand in die Mundart

Morje, kurz vor de dolle Daache feiere mir aach noch de indernazionaale Daach der Muddersprooch. Ich als Vochel wääs wie emm de Schnawwel gewachs iss, unn doodezu falld mir mool seallererschd die Mundart inn.

Also die Sprooch wo die Mamme schwäddsd, wannse de Klään middem Scheesewäänche spazierefahrt.

Scheesewähnche – was fier e scheenes anheimelndes Wort. Unn doodraan kammer aach ideal demonschdriere, dassmer in der Mundart manches besser ausdrigge kann wie in der geschriewene Sprooch. Es Dialeggd iss eewe nidd es Geejedääl vunn Hochdeitsch, indemm das es womeeschlich e niddrischeres Deitsch wär.
Doodezu gebbds e prima Buch midd dem Titel: „Wörter, die es nicht im Hochdeutschen gibt“. Doodrin hadd die Autorin – Sofia Blind hääschd se – in ganz Deitschland Beispiele fier so Ausdrigg gesammelt. Unn imme Inderwjuu hadd se verrood, dass ääns vunn ihre diesbeziechliche Lieblingswerder ausgerechend ausem Saarland kummt. Nämlich es Geheischnis. Awwer es gebbd aach Ausdrigg, wo erschd neijerdings uffkumm sinn. De Nuppsi aus Plassdigg, wo mer im Geschäft vor der Kass uffs Band leed, der hääscht in Norddeitschland „Miendientje“.

Mei perseenlicher Favoridd in Bezuuch uff spontaane Erfindunge vunn neije Werder iss awwer e Ausdrugg, vunn dem e Bekannder mir verzählt gehadd hadd. Er hädd geheert wie in Rohrbach in rer Wertschaft ääner zum Wert gesaad hadd: Gebb mer mool e Schnabbs! Awwer kää Gebiggder. Unn e Gebiggder wär in dem Fall e Hochprozendischer, wo de Wert in die Knie geht fier se gugge, dasser beim Innschenge werglich nidd iwwer de Eichstrich kummt. Seller Gascht hädd aach kinne saan: Schenk ordentlich inn! Awwer das annere klingt nadierlich vill uurischer.