Doofier gebbds bei uns denne scheene Ausdrugg Huddel, was uff hochdeitsch so vill hääschd wie Scherereije. Mer wääs nidd so richdisch was die Schäär angestellt hadd, dasse doofier herhalle muss. Wahrscheins kummt der Begriff aus der Schneiderei unn der Mode-Brangsche. Mer schwäddsd joo umgangssprachlich aach vumm Nerve-Koschdüüm. An dem wo dann erum gezobbeld unn geschnibbeld werrd.
Wo aach Schere zum Insadds kumm, das iss joo beim Frisör. Awwer was e richdischer Coiffeur odda Figaro iss, der duud sich beschwere, wammer saad, er wirrd sei Kunne schere. Heegschdens mool de Bart. All die wo kää Bart hann, die bleiwe ungeschoren. Manche losse sich joo aach die Hoor dehemm schneide, vunn der Fraa odder der Dochder. Wies in dem alde Gedicht hääscht: Was schert mich Weib, was schert mich Kind.

Mei Freind Schorsch, de Spassvochel, hadd neilich hinnerher zu seinem gesaad: mon Scheerie. Das iss allerdings nidd so gudd aankumm: Wann du mennschd, ich fummele hie an deiner Woll rum unn loss mich hinnerher noch veräbbele, dann haschd du dich awwer geschnidd, mei Schäfche! Jedds gehder widder zum Coiffeur seines Vertrauens unn kann denne klassische Spruch loslosse: Sauwer die Hoor geschnidd!

Es Gudde an de Hoor iss joo, dasse widder noowachse. Insofern sinn die direggd e Vorbild in punkto Nachhaldischkääd. Unn doo kinnd sich so mancher noch e Scheibche devunn abschneide.