1. Saarland
  2. Saarpfalz-Kreis
  3. St. Ingbert

Mundart-Kolumne "Die Atzel" für St. Ingbert

Mundart-Kolumne für St. Ingbert : Alles muss raus!

Mer glaabds ball nidd, wie schnell die Zeit vergeht. Jedds sinns schunn zwää Johr seit es neije Johrdausend volljährisch worr iss. Unn de erschde Monaad vun Diesjohr iss aach schunn widder rumm. Was mache iwwrischens ihr gudde Vorsädds, wammer mool frooe derf.

Wahrscheins sinn die aach schunn vumm Zahn der Zeit angenaachd. Noo de üppische Feijerdaache leid im Januar de Schwerpunkt eejer doodruff wie mer einisches widder losweerd: Gewicht, Gewohnhääde unn Gelumps. Was awwer nidd so äänfach iss, weil de Mensch sei Naddur, also de alde Adam, nidd so äänfach abschiddele kann.

Wo mer noch schwäärer ebbes widder loswerrd, das iss aggduell in de angeblich so soziale Neddse. Doo werrd joo im Iwwerschwang odder in der Raasch, in Wort unn Bild, so einisches uff die Menschhääd losgelass, wo mer hinnerher eejer denkt: Au weija!. Awwer alles was mer mool „gepostet“ hadd, iss sosesaan fier die Eewischkääd, wie die Sportreporder gääre saan. Noch problemaadischer iss das bei denne markande Markierunge, die wo mer sich in sei Korpus riddse lossd. Ich hann jedds gelääs, dass Tätowierunge gar nimmeh so aangesaad sinn. Dass awwer die Korreggtuure midd heffdische Trennungsschmerze verbunn sinn.

Harmloser wie Äuserunge im Nedds unn uff der Haud sinn doo die Sticker am Auto. Vor allem weil mer se leichder widder abmache kann. An denne kammer siehn wellem Fuusballverein mer die Daume driggd, wo mer im Urlaub war unn mer kann stolz verkünde, dass mer de Sprössling midd an Bord hadd. Awwer de staunende Betrachder sollt in dem Fall uffpasse, was er saad. Nur weil de Klään kää Hoor uffem Kobb hadd, laufend am Fläschje hängt unn leis vor sich hin brabbeld, meeschlichst nidd: Ganz de Babba!