Mundart-Kolumne für St. Ingbert Waarde uffs Krischdkind
Jedds isse ball schunn widder erumm, die Azwenz-Zeit unn es geht stramm uff die Weihnachde zu. Das iss joo es Feschd midd der längschd Anlaufzeit, wo als schunn Monaade vorher aanfangt. Awwer wann dann erschd mool uffem Azwenzkranz nooenanner die Kerze brenne, werrds drinn gemiedlich unn drause heggdisch.
Unn noo der bewährde Dramaturgie steid allmählich die Spannung. Vor allem die Kinner werre ganz hibbelisch unn kinnes kaum noch erwaarde bisses endlich losgeht.
Awwer das iss e guddi Geleeschenhääd fier die Gedulds-Muschgele se trainiere. Die Übung hääschd: Mir waarde uffs Krischdkind. Unn auserdemm saad mer joo nidd ohne Grund, Vorfreid wär die scheenschd Freid. De Weihnachds-Oowend selwer iss joo dann awwer komischerweis, gemess an der ausgedehnt Vorwärmzeit, vergleichsweis schnell widder vorbei. Was dann auser der Erinnerung an e stimmungsvolles Feschd unn me Bersch vunn Geschenge noch iwwrisch bleibt iss e noch greeserer Bersch aus Geschenkbabier. Unn all meeschliche Kartonnaasche unn Behälder fier die technische Gerääde. Wo mer seerschd ball nur midd Gewalt uffkried unn hinnerher nur schwäär widder loswerrd. Weil mer nidd wääs, in welli Tonn mer die buggsiere soll. Sie hann jedds schunn Tipps gebb, wie mer so Verpaggunge vermeide kann. Mer kinnd doch zum Beispiel es Geschenk in alde Zeidunge inwiggele. Doo hädde se awwer mei Freind Schorsch mool solle heere: Das kannschde midd deine Heringe mache, awwer nidd midd meinem After-Schääf!
Unn dann kumme manche uff die Idee unn saan: Näägschd Johr schenge mer uns nix meh. Unn das iss dann der Moment, wo mer, wammer genau hinheerd, ganz weid drause im Wald es schallende Gelächder vumm Niggelaus heere kann.
