Mundart-Kolumne für St. Ingbert Sieses odder Saures
Sie erinnere sich vielleicht noch, vor genau sechs Monaad hadd die Hexenaachd uffem Terminkalenner gestann. Unn heid Oowend tauche schunn widder gespensdische Geschdallde ausem Newwel uff.
Unn rufe diesmool Hallo Wien aus. Anscheins kann de Mensch nidd länger wie e halb Johr ohne Mummeschanz unn Gruusel auskumme. Als wär de Alldaach nidd schunn gruuselisch genuch. Awwer es iwwerkummt de Mensch joo schunn seit Urzeide de Drang fier sich zwischezeitlich mool se verbooze. Midd so Ridduaale werre nämlich angeblich die Geischder beschwoor unn vertrieb. Vielleicht solld mer das mool an denne Geischdesgreese ausprowiere, wo als noch nidd denne Fubbes midd der Uhrumstellung gebagg krien. Bei dem Thema bleibt emm joo niggs iwwrisch als dass mer de Kürbis, reschbeggtiefe de Kobb schiddeld.
Awwer wanns heid an der Dier klingelt unn de Ruf erschalld: Sieses sunschd gebbds Saures, doo iss das joo nur halb so wild gemennd. Wobei mer neijerdings heegeschdens die Ernährungsberaadung am Hals hadd, wammer an die Kinner masseweis Guddsjer verfidderd. Mer missd dann eichendlich immer e Warnweis middgewwe: bei zuvill Siesem isses midd der Gesundhääd ball Essisch. Awwer was e richdischi Sies-Schniss iss, die lossd sich doodevunn nidd abschregge. Uff der anner Seid soll joo ebbes Saures sogar luschdisch mache. Was emm dann leddschden Endes liewer iss, hängd vumm perseenliche Geschmagg ab. Odder mer greift zu saure Drobbs, doo hadd mer Sieses unn Saures in äänem.
Wie hadd e nidd genannd werden wollender Fielosoof zu dem Thema so treffend gesaad: Es Lääwe iss kää Zuggerschlegge. Desweeje hääschd joo aach das, was mir so dringend zum Lääwe brauche, Sauer-Stoff unn nidd Sies-Stoff.
