Doo kammer nur die Daume drigge, dasse am Enn midd ihre Kalkulazioone hinnkumme.
Wo aach weeje rer Brigg schwäär kalkulierd werrd, das iss am Glashidder Weijer in Rohrbach, äänem vunn de scheenschde Flegge rundrum. Nur dass mer nimmeh so bequem rundrum gehn kann, seit das Briggelche weeje Aldersschwäche gesperrt iss. Unn jedds gilt: Die kerzeschde Verbindung zwische zwää Punkte iss de Umwää.
Wie niddslich so e Brigg iss, merkt joo oft erschd, wann se baufällisch iss. Desweeje sinn sich all äänisch, dass der Iwwergang zeitnah, wie mer heid gäär saad, instand geseddsd werre solld. Der Knaggpunkt iss allerdings – wie bei immer bei so fromme Wünsch – wie mer die needische pekunjääre Middel logger mache kann. Unn doo hannse sich ganz kreeatief vumm Gaardebau inschbieriere losse. Unn die Gelder äänfach umgetopft. Gewissermaase zur Iwwerbriggung. Nämlich vumme Haushaltstiddel, wo aach fier e Verbindung vorgesiehn war. Unn zwar die zwische der Industrie- unn der Mühlestroos. Sie wirde awwer ganz bestimmt das Loch dann widder stobbe.
Wie eng die Beziejunge zwische Brigge unn Finanze sinn, das kammer im eichene Geldbeidel iwwerbriefe. Uff all Euro-Scheine sinn nämlich uff der Riggseid so Bauwerke hinnedruff gemoold. Kää spezielle, die wos in natura gebbd. Meh so scheen geschwungene Fantasieproduggde. Dass sich kää Land beschwääre kann, dasses iwwergang worr wär. Wannses nidd glaawe, gugge se mool noo!