Mundart-Kolumne Schridde zur innere Midde
Wann ihne zur Zeit samschdaachs morjens im Stadtpark e Grubb vunn Leid uffalle sollt, die wo sich e bissje ausergewehnlich benemme duud, misse se nidd verschregge. Ganz im Geejedääl. Das was doo so aussieht wie e gemeinschaffdlicher Ausdruggsdanz iss e Schnubberkurs in fernöstlicher Beweeschungs- unn Kampfkunschd.
Die Filosofie, wo doo dehinnersteggd, kennd mer iwwrischens aach in unsere Breide: In der Ruh leid die Kraffd! Unn die Iewunge, wo faschd wie in Zeitlupe ablaafe, hann so ebbes Beruhischendes unn Meditatiefes. Allään schunn beim Zugugge. Awwer die Akzioon soll joo zum Mitmache verleite. Mei Freind Schorsch allerdings kunnd doodemidd nix aanfange. Wie ich ne gefrood hann: Geeschde midd zum Taidschi, hadd der mir nur herzhaffd zur Antword gebb: Gesundhääd! Wahrscheins war dem das vill se vill Fachchinesisch. Unn auserdemm werrd der sich als dibbloomierder Grobbmoddoorigger bestimmt e Knoode ins Bään mache.
Ganz friejer hadd mer joo doodezu mool Schaddeboxe gesaad. Weeje demm, dass mer sich doodemidd notfalls aach selwer verteidische kinnd. Aach wann die äänzelne Beweeschunge garnix Aggressiefes aan sich hann. Unn sich ausgesprochen poeedisch aanheere. Midd Tiddele wie „Die Nadel vom Meeresboden holen“, „Der goldene Fasan steht auf einem Bein“ odder „Die Schöne am Webstuhl“.
Es Praggdische doodebei iss noch, dassmer sich kerperlich unn geischdisch beweeschlich halle kann, ohne sich groosaardisch vunn der Stell se beweeje. Also graad es richdische fier all Sportmuffel unn Leid wo zum Beispiel midd schweißtreiwendem Jogge nix am Hut hann. Weil se der Meinung sinn, es äänzische was bei ihne dehemm laafe missd, wär de Fernseejer unn de Kaffee.
