Mundart-Kolumne Die Atzel für St. Ingbert

Mundart-Kolumne : An der Scheenwedderfrond

Ab heit erklinge widder jeede Donnerschdaach heejere Tööne. Owwe uffem Howwels bei de Sommerkonnzerde. Doo geht mei Freind Schorsch immer so gääre hinn. Weiler so e grooser Fänn vunn Freiluffdmusigg iss.

Allerdings beschwäärd er sich, dasser doodefier denne steile Bersch enuff kraxele muss.

Das geht heid vill äänfacher, hann ich zum gesaad. In Zeide vumm Indernedd kammer sich die Musigg direggd uff sei Kommbjuuder „streame“ losse. Was sovill hääsche soll, wie dasse aangeströmt kummt. Logisch, hadder gemennt, die kummt joo dann aus der Steggdoos. Unn du haschd die frei Auswahl: Klassigg, Oberedde, Volkslieder odder die allerneijeschde Hidds. Heer mer doch doodemidd uff, hadd de Schorsch abgewunk. Du wääschd doch genau, dass ich die Hidds nidd vertraan. Unn doo ware mer dann direggd schunn beim aggduelle Thema: em Termomeeder sei extreme Kleddertuure. Bei gefiehlde verzisch Graad im Schadde, wo noch nidd emool Schadde iss, doo kried de Begriff „Heisse Rüddme“ e ganz besonneri Bedeudung. Mer solld awwer nidd denne Fähler mache unn sich bei dem Wedder doodezu heffdisch beweeje. In de Gesundheitstipps duun se joo unner annerem emfehle, dassmer middaachs e Siesta halt. Gudd gesaad, wammer sichs leischde kann. Das wär e bewährdi Methode in de siedliche Gefillde. Wo all die, wo sich hie iwwer die Hidds beschwääre, im Summer masseweis hinfahre odder flieje. Zum Gligg fangt joo jedds graad die Ferieje- unn Urlaubszeit aan. Unn wann mool de Arweddsdrugg vunn emm abgefall iss, doo lassd sich so e Hochdrugg vill besser aushalle. Wääschd du iwwrischens, was das gudde am Ur-Laub iss, hann ich de Schorsch gefrozzeld. Ei mer brauchs hinnerher nidd sesammeserechele.