Mundartkolumne Herbschd-Blues
IAwweile iss joo graad es Wedder fier so richdisch Triebsal se bloose. Wanns Kiwwele räänt dasses emm schiddeld. Unn de Wind geräuschvoll die leddschde Blädder vunn de Bääm bloost. Vunn Fall zu Fall bringt das dann jeed Johr verkehrstechnischer Huddel midd sich.
Bei aller Begeischderung fier die Naduur unn wann die Blädder im Herbschd noch so scheen aussiehn. Weil so e Riesebersch Laab halt ziemlich vill Naduur uff äänem Haufe iss.
Unn weil die ganze Blädder wo so e Baam nimmeh halle kann, uffem Boddem ziemlich nass unn gliddschisch werre. Awwer doo kummt dann die Technigg in Form vunn Laubsauger odder besser gesaad Laubbläser zum Insadds. Die wo jedds widder ihr Brunftzeit hann. Unn wo mer schunn vunn weidem nidd iwwerheere kann wie se röhre.
So e Abbaraad iss joo es genaue Geejedääl vumme Staubsauger. Er treibt nämlich die Blädder vor sich her. So wie e Jäächer uff der Pirsch, wanner hinnerm Wild her iss. Desweeje saad mer joo aach umgangssprachlich: Der doo macht awwer schwäär Jachd. Allerdings treibt er joo nur es Laab vunn ääner Stell uff die anner. Unn wanns dann bleed laafd, kummt pleddslich e Windstoos unn es Ganze geht widder vunn vorre los. Dann muss mer nur noch gugge, wie mer die ganz Pracht elegant loswerrd.
De Ausdrugg Blädderwald gebraucht mer joo aach leicht ironisch fier die Presse. Unn in der Zeidung stehn dann die einschläächische niddsliche Tibbs, was mer in soome Fall mache solld. Ach iwwrischens – wo mer jedds schunn iwwerall sieht unn lääst, dasses stramm uff Weihnachde zugeht. Doo muss ich graad dran denke, dass ich friejer als klääner Bub immer gemennd hann, dass die scheene Zagge an de Blädder midd der Laub-Sää ausgeschnidd worr sinn.
