So langsam werrds schunn widder Herbscht. Unn der hadd joo bekanntlich aach noch sei scheene Daache. In dem Sesammehang lääst mer jedds bei uns als immer effder, dass die Leit in unsere Breite immer älder werre. Unn das hadd dann zwische de Zeile direggd so e vorwurfvoller Unnerton. Vunn weeje de immense Rente unn de Pangsioonskass. Ich wääs jedds awwer nidd, was an dem Fäänomeen eichendlich so besonneres draan sinn soll. Odder dass das jeemools annerscht gewähn wär. Sovill wie ich informiert bin sinn die Leid friejer joo aach nidd immer jinger worr. So ebbes saad mer doch heegschdens mool zu ennem, wammer ne e bissje uffzieje will. Odder eventuell noch zur Fraa vun seinem Chef, wammer sich innschleime will. In all annere Fäll gilt de alde Spruch: So jung kumme mer nimmeh sesamme.Unn so ebbes saad mer joo aach kännem meh midde ins Gesicht, vun weeje dass er alt wär. Doo beniddsd mer heid so Werder wie Senioore, was awwer aach schunn widder verpöönt iss. Odder ganz aktuell Best-Äädscher. Wobei mer joo eejer de Indrugg hadd, dass die Alde immer jinger werre. So wie die sich in alle meeschliche Aktiwitääde eninnsterze. Die reifere Johrgäng, wie mer die vor Generazioone mool tituliert hadd, die gehn nimmeh am Stogg. Die laafe awweile midd zwää Stegge, unn zwar als frischgebaggeni Turnschuhgenerazioon imme affeardische Tempo midde durch die einheimisch Flora unn mache es Rotwild verschregge. Das iss gudd fiers Anti-Äätsching. Unn hinnerher bestelle die bestimmt kää Seniooreteller. Awwer die Kehrseit iss, dasses dann uff äämool heischt: Wann die alde Huppser noch so fit sinn, doo kinne die joo aach noch schaffe gehn. Am beschde bisse umfalle.