12. schunn die Hälfd vunn de Diercher am Azwenzkalenner sperrangelweid uffstehd. Unn e grooser Dääl vumm Gebägg schunn vorsorchlich als Kalorieje im Organismus gebungerd iss. Richdisch offiziell gefeiert werrd joo Weihnachde urspringlich erscht um de 24. erumm, wesweeje mer die Daache joo aach treffend die Feierdache genennt hadd. Awwer wasses de ganze Dezember iwwer als Vorgeschmagg schunn gebbd, das sinn die unvermeidliche Weihnachtsfeiere in de Vereine, de Ämder unn de Betriebe. Was mer sich ungefähr so vorstelle kann wie e Betriebsausfluuch, nur nidd imme Bus, sondern im Nääwezimmer vumm Vereinslokal.

Wos nääwe besinnliche unn mahnende Worde vumm Vorstand aach noch e paar Wiener midd Kardoffelsalaad unn e Tombola midd ganz vill Kalennere samt Johresriggbligg gebbd. Awwer während das joo geschlossene Gesellschaffde sinn, finnd es vorweihnachtliche Treiwe, wanns sich drause abspielt unn ambulant, also im Schritttempo vor sich geht, uff de viele Weihnachtsmärkt statt.

Unn dasses uns trotz der unvermeidliche Heggdigg so richdisch warm ums Herz werrd unn mer kää kalde Fies krien, doo sinn e paar Feinschmegger vor einische Johre uff die Idee midd dem Gliehwein kumm. Im Sesammewirke midd Zimtsterne unn Schbeggulazius erschliest sich doodebei unsre Geschmaggsnerve e ganz neijes, nachhaldisches Erlebnis. Awwer weil das werzisches Heißgetränk e kläänes Immiddschproblem hadd, hann jedds die Winzer e Kwalitäädsoffensiefe gestartet. Unn es Endproduggd iss jedds so gudd, dasses sogar vunn rer echde Gliehweinkeenischin kredenzd werrd.