Unn die Muse offensichdlich hie zeitweis ihr Hauptkwardier uffgeschlaa hann. E ganz groosi Nummer iss joo kuldurell seit sage unn schreiwe schunn 32 Johr die Kläänkunschd-Woch. De Duffd aus der besaachde Pann loggd jeed Johr deitschsprachische Kabareddischde aus de fernschde Winkele aan. Die wo dann dank ihre Beiträäch die Pann zum Bruzzele bringe. Unn midd satirische Zutaade scharf abschmegge unn pikant würze. Wie mer an de Besucherzahle in denne ganze Johre sieht, scheint em Publikum die Rezebbduur se schmagge. Ausserdem gebbds dann aach noch in der Fuusgängerzoon e Markt, wo de Weisgerber quasi als geischdischer Schirmherr fungiere duud. Weil der sellemools das farwefrohe Bild midd dem Thema gemoolt hadd. Unn was werrd direggd vor dem seinem Geburtshaus besser passe als wie e indernazionaales Kinschdler-Sümpossium. Was definiert werrd als „Zusammenkunft zum Zwecke des Austausches von Erkenntnissen und Gedanken“. Unn wo Mooler vunn hiwwe unn driwwe Dengmerder Motiefe uff der Leinwand vereewische. Awwer nidd nur zu ebener Erd werre Gemälde ausgestellt, aach in de heejere Reeschioone kammer e ganzi Paledde an zeitgenössische Werke vunn de „Turmkünstler“ bewunnere. Owwe am Beckerturm, wo joo e bekanndes Wahrzeiche für unser Stadt iss. Noch aus der Zeit, wo die Reporter die Dengmerder als „Bierstädter“ tituliert hann.