Kumm liewer Mai unn mache ...
In der leddschd Naacht im April, also die wos direggd in de erschde Mai eninn geht, doo iss tradizionell immer ebbes los. Weil im Mai joo der Monat iss, wo garandierd die Wonne ausbrecht unn die Bääm ausschlaan, die wo so langsam e Greenstich krien.
Die Natur duud ringserumm erwache. Genauso wie de Frosch in seinem Glas, der wo im Nääweberuf die Temberaduur aanzeid. Der reibt sich verschloof unn verwunnert die Aue: ei, iss de Winder endlich rum? Dann hubbsder langsam die Lääder e Trebbche heejer. Unn die Mensche werre, sobald die Sunn aanfangt se scheine, infolche vunn Friehlingsgefiehle vunn Iwwermut unn Kreeatiwitääd gepaggd. Was sich inn der besaachde Maienaacht in Form vunn gruppedinnaamischem Mummeschanz unn Schabernack äussert. Zum Beispiel in zugebabbde Schlissellecher.
Friejer hadd mer joo noch annerschd zu der Naacht gesaad, awwer das geheerd sich heid nimmeh. Doo derf mer jedds korregderweis heegschdens noch saan: das iss die Nacht der flugtechnischen Sonderbegabungen.Ich bin joo sowieso e grooser Anhänger vunn so innfallsreiche sprachliche Verrengunge vun de berufsmääsische Wortverdreher, wie de Shakespeare die genennt hadd. Vor allem die Kabareddischde sinn joo doo ganz groos drin. In die Stadthall kummt näägschd Wuch die Tina Häusermann mit me Programm, wo denne scheene Titel hadd: Die letzte beißt den Hund.
