Es kann joo nix schaade, wammer geleechentlich uff sein Gesundhääd achte duud. Unn wann gääbs doo e besseri Geleechenhääd wie jedds, wo de Winder langsam erumm iss. Unn mer die lääre Badderie unn die alde Knoche midd Nährstoffe unn frische Fiddamiene widder uffpäppele kann. Unn am beschde, so empfehle die Ernährungs-Fachberooder, greift mer zum dem Zwegg zu einheimische Gewächse. Unn doo trefft sichs gudd, dass hie bei uns erumm jeedi Menge vun gesundem Gemies wachst. Wo aach noch gudd schmeggd. Weil mer sunscht joo oft heerd: So wie das schmaggd, doo muss das schwäär gesund sinn. Unn doodebei verzieht der es Gesicht, dass emm de Abbedidd vergeht. Das kann emm awwer beim Bärlauch zum Beispiel nidd passiere. Der gebbd nämlich emm Esse erscht die speziell feinwerzische Note. Allerdings soll mer, wammer ne selwer suche geht, uffpasse, dassmer ne nidd middem Maigleggche verwechsle duud.Was aach zur Zeit gääre in der einheimisch Kich verschafft werrd, das iss de Lööwezahn. Bei uns besser bekannt unner dem abbediddanreechende Noome Bettsäächer. Unn der soll joo aangeblich nääwe seine diesbeziechliche Eichenschaffde aach gudd sinn fiers Abspegge. Unn weil das ganze noch besser schmaggt, wammer e bissje Spegg draanmacht, doo schließt sich de Kreis widder.