Mundartkolumne Iwwerfluss unn Iwwerflissisches

Jedds iss endlich März, awwer de Winder iss scheins noch nidd erum. Obwohl das joo der Monaad sinn soll, wo de Bauer die Päär aanspannt. Apropos – fier manche Leid fangt es Friehjohr dann aan, wann die Winderrääfe runner unn die Summerrääfe druff kumme. Odder wann die lange Unnerbuchse widder im Schrank lande. E anneres Indiez, dass es uffwärdds geht, iss joo die Friehjohrsmiedischkääd. Zu meinem Freind saan ich dann immer: Schorsch, du haschd so ebbes Abgründisches. Doo war der geschmeichelt: Weil ich so inderessant bin? Nää, du bischd immer am Gähne.

Mundartkolumne: Iwwerfluss unn Iwwerflissisches
Foto: SZ/Robby Lorenz

Was in dem Monaad aach aansteht das iss es Großreinemache. Wo mer de Abfall unn de Müll, der wo sich iwwer de Winder aangesammelt hadd, fortschaffe duud. In Dengmerd gebbds desweeje als mool widder tonneweis Probleme. Mer kinnd aach saan, die Entsorschung iss bei uns es Sorjekind.

Woos aach um Iwwerflissisches geht unn um Kilos wo mer loswerre will, das iss bei de Diääde. Uff de Titelseide vunn de einschlächische Zeitschriffde lacht em jeed Wuch e neijie Wunnerkur aan. Mer wunnert sich nur, wer iwwerhaupt die Zeit hadd fier die Rezebbde all ausseprobiere. Fier die Stigger zwää Dutzend eggsoodische Zutaade se besorje bräuchd mer e Sonderurlaub. Awwer die ganze Gerääde wo doodefier needisch sinn, kammer dann weenischdens in der Garaasch verstaue. Doo iss joo jedds noom Ausmissde widder Pladds. Awwer wammer das alles se Fuus inkaafe geht, haddmer die Kalorieje sowiesoo längschd schunn verschaffd. Auserdemm hääscht das jedds garnimmeh Kalorieje, das hääscht jedds Joule. Ausgesproch werrds Dschaul. Unn so schmeggd das Zeich aach.

Meistgelesen
Neueste Artikel
Zum Thema
Aus dem Ressort