Doo war nämlich der Erfolch eejer määsisch. Die Bolidigger, wo diesbeziechlich e leuchdendes Vorbild sinn, rufe uns aach in unreechelmääsische Abstänn dezu uff, fier Maß se halle. Odder fier unser Gerdel enger se schnalle. Was emm joo umso leichder falld, wanns nidd unbedingt de eichene iss. Manche halle awwer nur insofern es Maß, indem dasse am Aschermiddwoch schunn widder masseweis Bierkrüüch vor sich stehn hann. Mer gönnt sich joo sunschd nix! Awwer aach die Filosoofe hann joo schunn seit uralde Zeide gelehrt, dass mer im Lääwe alles meeschlichst nur in Maße geniese sollt. Weil im annere Fall hinnerher unweigerlich de Kater folcht. Wobei es Maß aller Dinge joo nidd unbedingt es Middelmaß sinn muss. Awwer die Mensche hann halt die Aangewohnhääd, dasse nidd uff weise unn kombedende Ratschlääch heere wolle.

Unn in soome Fall ergreift dann die Regierung manchmool Maßnahme. Unn meischt dort wos richdisch ihre Bürger so weh duud. Ich hann sogar neilich mool e puddsischer Druggfähler in de Zeidung gelääs, wo se saan wollde, die Regierung ergreift Sparmaßnahme. Awwer gestann hadd doo tadsäschlich Spaßmaßnahme. Iwwer so Spässjer kinne allerdings meischdens nur die Leid richdisch lache, wo vunn derardiche Maßnahme nidd perseenlich betroff sinn.