Zu de bekanndesche Sehenswirdischkääde in Dengmerd zählt joo die alt Schmelz. Die wo desweeje so hääscht, weil doo friejer Eise geschmolz worr iss. Awwer es gebbd joo nidd nur die Schmelz, mer gebraucht joo aach de Ausdrugg der Schmelz, unn das nidd nur in der Zahnheilkunde. Vumme Sänger saad mer zum Beispiel, er hädd denne gewisse Schmelz in der Stimm. Doo fiehlt der sich geschmeichelt. Mer muss nur uffpasse, dass mer nidd in Ungedanke de Vokal verwechselt, dann wär der beleidischt. Weiler so schmalzisch nidd singt. Manchmool trääde die Tenöre aach dutzendweis uff, unn dann duud die anwesende Damewelt vor lauder Begeischderung gleich reiheweis hinschmelze.Mer saad awwer aach vunn leggere Sache, dass die e zarder Schmelz hädde. Unn vor allem im Sommer denkt mer doodebei an die feine Eisbälljer, wo emm jedds aus de Bechere unn de Tietcher aanlache unn emm midd de needische Kalorieje versorje. Die werre in dem Fall äänfach mool nidd middgezählt. Dass es Eis e Grundnahrungsmiddel iss, das sieht mer schunn doodraan, dasses wie beim rollende Middaachstisch vum Eismännje ausgefahr werrd. Unn wie in der Hochgastronomie gebbds doo middleerweile aach die dollschde Kreazioone. Desweeje hääschds joo aach Speise-Eis. Doo werre die originellschde Zutaade sesamme gemixt. Ingwer-Joghurt zum Beispiel, Melone midd Paprika odder Zitrus-Basilikum. E Jahrgangs-Eis gebbds allerdings noch nidd, weil sich das aus verständliche Gründe kää ganzes Johr halt. Unn auserdem schmeggts joo so gudd, dass es direggdemang verbuddsd werrd. Weils sunscht ball schmelzt. Unn das wär doch schaad, odder?