Weil das flissische Heißgetränk bei uns immer beliebder unn in raue Menge verkonsumiert werrd. Inn denne stressische Zeide iss der joo morjens schunn die Grundlaach, dass mer iwwerhaupt uff Tuure kummt. Emm klääne Mann sei Doping sosesaan.

Kaffee werrd joo heiß uffgebrieht, schunn weejem Aroma. Awwer bloos Brieh iss das längschd nimmeh. Es gebbd ne nämlich middlerweil in all Wariazioone unn gemixt midd Zutaade, wo mer friejer gemennt hadd, dass mer sich doodevor schiddele werrd. Unn bei manche Sorde wääs mer garnidd genau was drinn iss, weil ses inn so Kapsele unn Pädds versteggele.

Kaffee ferdert die zwischemenschlich Kommunikation. Zu Beispiel bei de Kaffeekränzjer, wo es Luwies emm Elfriede die aktuelle Neijischkääde briehwarm verzähle kann. Unn es macht dann uff die fein Tuur unn saad hinnerher, das hädd sie nidd die Bohne interessiert.

Awwer nidd nur die Kaffeetante duun doodemidd ihr Sprechzentum animiere. Aach de Onkel brauch fiers tägliche Quandum an Koffein sei Espresso, Cappuccino odder sogar Macchiato.

Friejer, wie de Kaffee auser Milch unn Zugger noch kää zwäähunnert verschiedene Aromas gehadd hadd, doo iss der in zwää Geschmaggsrichdunge uff de Disch kumm: entweder se stark odder se lebbsch. Der ään hadd Herzklobbe gemacht unn der annere war de sogenennde Bliemcheskaffee, e bohnenlosi Gemeinhääd. Der war so dinn, dass mer unne in der Tass es Blummemuschder hadd kinne siehn. So saad mer aach bei uns als gääre im Spaß, der doo Kaffee iss joo zum Fortlaafe. Odder uff neideitsch: Coffee to go.