Frohsinn im Freije
So e Umzuuch iss joo normalerweis ebbes, was ziemlich stressisch unn uffwendisch iss. Dreimool umgezoh, sadd mer als, das iss so gudd wie äämool abgebrennt. Nur nadierlich nidd an der Faasenacht. Doo zieht mer sich selwer um, unn guggd, wasse sich in Dengmerd dies Johr widder alles hann infalle losse fier es tradizionelle närrische Deefilee.
Uff denne Ansteggnoodele fier die diverse Umzüüch hannse sich diesmool vumm Weisgerber inschbierere geloss unn hann de Till Eulenspiegel druff gepinnt. Das war joo e begnadeter Wortverdreejer, wo käänem Schabernagg ausem Wää gang iss. Unn sei Markezeiche war de Spichel, denne wo er de brave Spiesbürjer vorgehall hadd. Als wollder saan: Wer issen jedds doo de greesere Narr? Die Faasenacht zerfallt joo zeitlich in verschiedene Etappe. Im Johr vorher, am 11. 11., gehts schunn los. Dann kumme die Kabbesiddsunge, wo sich schunn de Wechsel in der Regierungsform andeute duud. Midd Prinze unn annere Tolitääde, wo doo es Zebbder schwinge. Am fedde Donnerschdaach iwwernemme dann die Fraue es Reeschimend. Unn anschließend werrd die Faasenacht noo drause verleed, ins Freie, wos um die Zeit noch ziemlich kalt iss. Desweeje nennt mer das in Fachkreise die heiße Phase. Die freilaafende Narre sinn ab dann nimmeh se bremse. Unn das Ganze nemmt sogar umsterzlerische Forme aan, wann bei de diverse Rathauserstirmunge die Unnertane ihre Owwertane die Lewiddde lääse. So ebbes hädd dem Till Eulenspiegel sicher gefall. Der hadd e ziemlich eichenwillischi Vorstellung vun rer ideal Regierungsform gehadd: Am beschde e durchwachseni Anarchie midd me kräffdische Anarche an der Spitz.
