In leddschder Zeit hadds joo widder Diskussioone gebb weeje denne Planspiele, wo dann eventuell de Geschäffde in der Innestadt Konkurrenz gemacht werre kinnd. Dasse se hie so Inkaafszentre aansiedle wolle, unn zwar uff der grien Wies, wie mer saad. Awwer die Probleme trääde momentaan in de Hinnergrund, weil uff demselwe Belaach die Ballkinschdler unn Torjäächer zugang sinn. Nur nennt mer das dann nidd grieni Wies, sondern Rasen. Weil die Kigger im Idealfall uff dem frischgemähte Platz hin unn her fliddse bis ne die Brieh laaft. Weeje de hoohe Temperaduure. Unn die Fäns hugge dehemm middme kiehle Bierche unn duun die arme Buuwe in ihre korze Buggse als noch anfeiere. Fuusball hadd sich joo schunn längscht vunn rer Nääwesach beinäägschd zu rer Staatsaffär entwiggelt, wo die entsprechend Häupter uff der Ehretribühn hugge. Unn es wird aach nimmeh geholzt unn gebolzt wie zu Zeide vunn de Stroosefusballer. Heit sinn MIddelfeld-Strateesche gefrood unn Trainer, wo sich als Taktigger bewähre.Fuusball, so saan die Fachleid, iss joo desweeje weltweit so beliebt, weils angeblich e ganz äänfaches Spiel iss. Das hääscht awwer nidd, dass nidd am Spielfeldrand tiefsinnische Spruchweishääde ins Kraut schiese werrde. So Sache gesaht werre wie: De Ball iss rund. Noom Spiel iss vorm Spiel unn jeed Spiel iss annerschd.

Bei uns hannse joo diesmool uff das Pabligg Wjuuing verzicht. Awwer es Wedder wär aach nix gewähn. Mir Dengmerder werre beim Fussball sowieso immer ganz wehmiedisch. Weil mir ganz friejer sogar mool e richdischer Nazionalspieler gehadd hann. Sellemols zu Heinz Vollmars Zeide.