Zur Zeit kammer in Dengmerd verstärkt in die Rohre gugge. In die nämlich, wo se jedds flächedeggend hie in de Boddem verleeje. Fier die Nah- unn Fernwärme, wo se doo geplant hann. Wobei sich allerdings die wos trefft nidd besunnerschd doodefier erwärme kinne. Obwohl das joo weeje der Verbesserung vun der Energiebilanz e verninfdischi Sach iss. Besunnerschd die Audofahrer, wo sowieso leicht erregbar sinn wanns nidd richdisch voran geht, verdrääje die Aue unn gebrauche schlimme Werder. Awwer wann so ebbes schunn sinn muss, dann doch am beschde in der Ferijezeit. Wo die meischde sowieso uff Tuur sinn unn uff der Audobahn dann Heimatgefiehle krien. Weilse sich doo genauso unn noch schlimmer durch die Baustelle durchquäle. Vielleicht sollt mer die Gellechenhääd nitze unn aus der ganz Sach die Heggdigg erausnemme. Unn sei eicheni Instellung zum fahrbare Unnersatz iwwerprüfe. In so rer Art perseenlichem Verkehrentwigglungsplan. Unn doo taucht jedds immer effder de Vorschlaach uff, fier äänfach mool uff sei Audo se verzichde. E Redaggtörin vun hie hadd sogar neilich imme heroische Selbschtversuch die Idee geteschded, unn sich e ganzer Daach nur uff die effendliche Verkehrmiddel verloss.Das war awwer offensichtlich aach nidd graad die Idealleesung. Unn iss eejer unner die Rubrigg Entdeggung der Langsamkääd gefall. Also graad richdisch fier die Urlaubszeit, wo mers joo sowieso gääre e bissje langsamer aangehn losst. Allerdings gebbds sogar doo noch Siduazioone, wos emm liewer wär wanns flodder voran ging. Wann de Ober uff der Speisekaard empfehle duud: Unser Spezialitääd sinn Schnegge. Unn de Gascht saad: Joo ich wääs, geschdern hadd mich ääni bedient.