Es Wedder war joo in dem doo Summer nidd graad so es Gelwe vumm Ei. Unn eejer se vergleiche midd unsere Olümpionieke. Wo joo die Erfolgsbilanz vunn de Schwimmer doodrinn bestann hadd, dass gligglicherweis kääner ertrunk iss. Awwer jedds hadd sich joo uff de leddschde Drigger am Enn vunn de Ferije es Klima doch nochmool so richdisch ins Zeich geleed unn uns e kräfdischi lokali Erwärmung beschert. Unn im Freibad, wo mer am Sunndaach kaum noch e Parkplatz gefunn hadd, hannse unner strahlendem Himmel e zinfdischi Puul-Pardie kinne feiere. Wo mer sicherheitshalwer noch nidd mool hadd misse selwer ins Wasser gehn. Unn zum Abschluss iss dann in der sternklare Naacht aach noch e Schauer niddergang, awwer in dem Fall e besunnerschd indruggvoller aus lauder Sternschnuppe.Awwer ään Guddes hadds doch gehadd, dass de Summer in dem Johr sein Name faschd nidd verdient gehadd hadd. Mir bleiwe weenischdens vunn de Weschpe unn dem ganz lässdische Miggezeich verschont, wo emm in friehere Johre de Genuss am Freiluft-Lääwe aarisch vermiest hann. Iwwrischens war das aach de Aanlass fier die Erfindung vumm Bierdeggel. Schunn doomols sinn nämlich in de Biergäärde laufend so klääne Biesder ins Getränk eninngefall. Unn weil sich nur die reiche Leit e Kruuch midd Deggel hann kinne leischde, doo hadd mer fiers Fuusvolk e praggdischer unn billischer Schutz entwiggelt. Weil der nämlich urspringlisch fier owwedruff war, desweeje heischt er joo aach Deggel. Heit leid er meischt unnedrunner unn iss vielseidisch verwendbar. Zum Beispiel wann de Disch mool waggelt. Vorschlääch fier sei Bierdeggel als Steiererklärung innsereiche hann sich bisher allerdings nidd durchgeseddsd.