Wann ebbes besunnerschd gelungen unn makellos werre soll, doo duud mer das, woodraus es gemacht iss, veredele, wie die Experde saan. Das fangt bei der Bidderschokolaad und de edle Tröbbcher aan unn geht iwwer die Edelschnulze bis zur menschliche Spezies selwer. Die wo joo, wie schunn de Altmeischder Goethe aangeordnet hadd, edel, hilfreich unn gudd sinn sollt.Awwer sogar aus so ebbes scheinbar unscheinbarem wie Stään kammer noch ebbes hochweerdisches draus mache. Das hadd mer am leddsche Wocheenn scheen kinne in der Stadthall bei der Edelstäänbörse siehn. Wo die Leid masseweis hingepilcherd sinn fier die Prezioose se bestaune. Vielleicht hängt das allgemeine Interesse awwer aach midd de derzeidische Krisezeide sesamme. Wo mer joo verstärkt die Flucht in die Sachweerde beobachte kann. Unn ball an jeder Egg Inschdituude uffmache, wo mer es Edelmetall, wo mir joo all masseweis im Keller gebunkert hadd, zu Geld mache kann. Ich hann neilich bei mir sogar imme ausrangierte Zahn noch e stilli Gold-Reserve entdeckt. Was die normale Stään anbelangt, doo kammer joo doodemidd nidd bloos Heiser baue, nää die werre oft joo aach zu Kunschtwerke verschafft. Awwer ich glaab, im Interesse vumm effendliche Friede losse mer das Thema bei uns hie liewer mool in der Versenkung.

Was joo aach oft als edel bezeichend werrd unn wo graad die Hochsääsong war, das sinn die Pilze unn doo speziell die begehrte Stäänpilze. Unn die soll mer joo, wenn se mool in der Pann ware, aach nimmeh uffwärme. So hannse jedenfalls friejer gesaad. Awwer das soll joo jedds aangeblich pleddslich alles iwwerhaupt nimmeh woor sinn. Obwohl joo mei Oma Stään unn Bään hädd kinne schwöre, dass das stimmt.