Midd seinem knallroode Autfitt unn em Logo vunn der Stadt ause druff. Unn mer muss saan, selde hadd sich e Innrichdung, wo sich joo eichendlich nur immer im Kreis rumm dreht, so bewährt. Mer kinnd faschd saan in dem Konzept wär Musigg drinn. Der Bus fahrt nämlich im Takt unn zwar jeedi halb Stunn vum Busbahnhof ab. Vill Leid mache sich garnidd richdisch klar, wie wichdisch unn praggdisch de effendliche Personenahverkehr iss, der wo sich hinner der misteriöös Abkerzung ÖPNV versteggelt. Es hadd sogar schunn mool e Film midd der Marilyn Monroe gebb, der wo Bus Stop gehääsch hadd. Manche hann joo es leddschde Mool in soome Bus gehuggd, wie se in die Schul gang beziehungsweis gefahr sinn. Unn zu der Zeit hadd mer denne Bus dann aach zu pädagogische Zwegge gebraucht, fier die Mengelehr se verkliggere: Wann im Bus drei Leid hugge unn fünf aussteije, wievill misse dann widder innsteije, dass de Bus läär iss? Was awwer fier vill aach e unvergessliches Bus-Erlääbnis iss, das war joo de jährliche Betriebsausfluuch. Wo se immer hann uffpasse miss, dasse bei der Hemmfahrt känner vergess hann.

Desweeje hadd de Aanfiehrer jedesmool all abgezählt unn gefrood, ob jeder aach sei Nääwemann nääwe sich hädd. Awwer doo hadd mei Freind Schorsch gemennd, wahrscheins aus Gründe der Gleichberechdischung, er hädd liewer e Nääwefraa nääwe sich. Das war awwer dann schunn spääder am Oowend. Uff jede Fall war die Riggfahrt dann noch schwäär melodisch, um nidd se saan melodiöös. Unner dem Moddo: Wie tief hann ihr gesunken.