Ich sammele joo furchtbar gääre so Ausdrigg, wo im Umlauf sinn unn wo mer, wammer mool genauer hinheerd, uff äämool stutzt unn sich am Kobb kratzt. E kloorer Begriff, denne wo mer in leddschder Zeid effder in de Nachrichde heert, wanns um poliddische Theme geht, das iss de Kuhhandel. Unn der iss dann nidd als Kompliment gemennt. So ebbes iss joo ziemlich ungerecht geejeiwwer vunn de Viehzichder, wo ihr Verträäch noch boddemstännisch midd Handschlaach besiechele duun. Im Geejesatz zu der Polidigg, wo seiteweis Verträäch produziert werre, wos awwer hinnerher oft heischt: Mei Name iss Hase, ich wääs vunn nix meh. Unn die arme Kieh werre joo sowieso schunn dauernd diskriminiert. Wammer zum Beispiel vumme Kuhdorf schwäddsd odder doodevunn, dass mer die Kuh flieje losst. Womeeschlich noch lila aangemoolt. Was joo dann schunn fascht an denne sprichwertliche Rinderwahnsinn grenzt.Unn uff äämool solle die Kieh sogar noch schuld sinn am Ozonloch. Unn jeddsd iwwerleeje se krampfhaft wie se die Kuh widder vum Eis krien. Doodebei iss das Nutzvieh joo garnidd so dumm, wie mer manchmool behaupte duud. Nidd umsunscht schwäddsd mer joo aach vum I-Kuh, wo die Intelligenz messt. Unn ausserdemm liefert die Kuh uns die Milch, wo miede Männer munder macht. So e friedliches Vieh iss aach fier de Tourismus wichdisch, weil ohne Kuh der Landschaft ebbes fählt. Weil ihr Anbligg die Nerve vun de gestresste Stadtmensche beruhischt. Wann sie so uff der Wies steht unn wiederkäut. Was joo im Grund e Art vunn ingebautem Rieseikling iss.

Unn wann se sich dann mol genau ausrechne, dasses Ozonloch eventuell klääner werrd, wammer die Kieh ganz abschafft, doo iss das doch e Milchmädcherechnung.