1. Saarland
  2. Saarpfalz-Kreis
  3. St. Ingbert

Mundart-Kolumne: E ganzer Korb voll feinem Zeich

Mundart-Kolumne : E ganzer Korb voll feinem Zeich

Es iss nimmeh wegsedischbediere: de Herbschd iss doo. De Hudd odder die Kabb unn de Schirm kumme widder zum Insadds. Unn unnedrunner muss mer sich aach e bissje wärmer aanzieje. Awwer desweeje muss mer joo nidd gleich e Fluddsch zieje, de Herbscht hadd bekanntlich aach noch sei scheene Daache.

Unn er duud joo aach midd spezielle Nahrungs- unn Genussmiddel sei Fillhorn ausschidde. Ums mool poetisch aussedrigge. Midd knaggische Äbbel, wo uff de Streuobstwiese im Bliesgau jedds vumm Baam erunner emm aanlache. Allerdings derf mer das nidd als Aanrechung uffasse, fier sich an denne so stiekum se bediene. Doo kann so e Zugriff leicht zum Zankabbel werre. Aus dem Grund werrd das Obst joo aach gääre verflissischd unn in Flasche abgefillt. In Form vunn Saft, wo dann – weeje dem triste Wedder drause in der Naduur – aach ganz korrekt naturtrieb druffsteht. Odder als Hochprozendisches, wos emm dann so richdisch warm ums Herz werrd. Doo hadd schunn der Herr Williams e Lied kinne devunn singe. Der wo allerdings midd de Äbbel nix am Hudd gehadd hadd. Apropos Hudd, nidd nur vunn de Bääm falle die leggere Sache, aach unnerum spriest so einisches fier die Broodpann. Die Pilze duun ausem Boddem schiese.Unn dann nadierlich de Kürbis, der wo e Kultgemies worr iss. Unn ball, wanns widder hääscht: Hallo Wien, doo kammer denne ganz prima als grusselischi Maske verwenne. Desweeje schreiwe die Kinner in der Schul aach Kürbiss midd zwää s. Weeje de Vampiere. Awwer meischdens duud mer denne kulinarisch verwerte: Du bischd gudd, du kummschd in die Subb.