Jedds am Wocheenn hadd die Innestadt endlich aach ihr zinfdischer Weihnachtsmarkt. Unn speziell doodefier hann se die Gudd Stubb richdisch scheen geschmiggd unn uffgemeewelt unn sogar e ganz neiji Feschtbeleichdung spendiert. Dengmerd midd meh wie drei Sterne sosesaan. Unn fier die Chrischdbäämcher, wo doo in der Fuusgängerzoon Spalier stehn hadd mer kinne sogar e Patenschaft iwwernemme. Mer braucht se noch nidd emool se giesse, weil die die ganz Zeit scheen frisch gehall worr sinn weeje der durchwachsene Wedderlaache. Awwer weenischdens duun die Bääm dann nidd noodele. Direggd vor der Engelbertskerch hanne se e Prachtexemplar vumme Kawennsmann uffgestellt, sogar midd Päggelcher draan. Wo se awwer vorsichtshalwer ganz owwe hingehängt hann. Iwwrischens, weil die Naduurliebhaber beim Thema Abholzung immer gleich uff die Ballustrade gehn, doo werre die Weihnachtsbääm joo aach heisedaach nimmeh gefällt. Die kried mer jedds direggd fangfrisch iwwerall im Netz se kaafe. Nää, das war nur e klääner Scherz! Richdisch ernscht werrds joo dann beim Inkaaf vum Weihnachtsbaam, wammer es passende Exemplar aussuche soll. Aach wanns Bäämche schunn fix unn ferdisch uff sei Abnehmer waard, sinn joo die Geschmägger beim Endverbaucher ganz verschieden. Es gebbd die, wo sich eewisch nidd entscheide kinne unn annere, wo kurz unn schmerzlos es erschtbeschde mitnemme. Besonnerschd bühnereif werrds joo immer dann, wann se sich paarweis uff die Suche mache. Ääs geht meh noh praggdische Gesichtpunkte unn ob mer genuch dranhänge kann. Er steht denääwe unn hadd an allem ebbes se meggere: Se schebb, se deier unn vill sevill Noodele. Unn iwwerhaupt war friejer meh Lamedda.