Also das doo war joo jedds garnix midd weisse Weihnachde. Eejer ganz im Geejedääl. Unn der arm Weihnachtsmarkt iss schunn widder vum Wedder aarisch gebeidelt worr. Obwohl die Dengmerder joo bekannt defier sinn, dasse ihr Tellere immer scheen läär esse. Was awwer bei der Geleechenhääd aach noch ins Wasser gefall iss, das war de Weltunnergang. Wose uns joo schunn wochelang vorher uff alle Kanääl fescht versproch gehadd hann. Awwer hinnerher kammer beruhischd feschtstelle, dass es äänzische wo definitiv unnergang iss, die Mayas gewään waare. Kää Wunner bei soome unzuverlässische Kalenner. Vielleicht leit das awwer aach draan, dass mir uns jeder Stuss uffs Au drigge losse, wanner nur im Fernsehn kummt. Noo dem Moddo: ich glaawe nur was ich siehn. Jedds mussmer nur die ganze Absage, wo schunn erausgang sinn, widder redour nemme. Unn gugge wo mer das ganze Geld widder herkried, was mer vorsichtshalwer noch vorher uff de Kobb gehau hadd. Weil joo bekanntlich die Welt nobel zugrund geht. Vunn de ganze Mahnunge, wo mer in vorauseilender Kondobereinichung weggeschmiss hadd, mool ganz abgesiehn. Mei Freind Schorsch war awwer hinnerher doch ziemlich erleichtert. Wann er ehrlich wär, hadder gesaad, hädd ihm de Weltunnergang nidd so richdisch in de Kram gepasst, weil er momentaan graad e Haufe annere Sache um die Ohre gehadd hädd. Emm Schorsch sei Fraa, wo e besonnerschd mitfiehlende Seele iss, hadd sich speziell Sorje gemacht, was midd dem ganz Viehzeich passiert, wann känner meh doo iss fier die se fiddere.Middlerweile hadd uns all de Alldaachstrott widder, midd seinem Huddel unn seine Wehwehcher. Awwer doodevunn geht joo nidd gleich die Welt unner.