St. Ingbert · Die Faasenacht zerfallt joo bei uns in zwää Phase. Äämool die drei tolle Daache, wo awwer eichendlich schunn am fedde Donnerschdaach losgehn. Unn vorher gebbds joo die Session, wo in jedem Ordsdääl, der wo karnevalsmääsisch ebbes uff sich halt, die Kabbesiddsunge iwwer die Biehn gehn. Die hääsche deshalb so, weil e Kabb sich immer am beschde macht, wann se gudd siddsd. Obwohl die joo eichendlich graad an Faasenachd meischt schebb siddsd. De Volksmund kommt joo iwwerhaupt bei dem Thema Kobb-Bedeggung schwäär uff Tuure. Weil das friejer mool nidd ganz unwischdisch war, wie mer doodemidd im soziaale Lääwe umgang iss. Vor wemm mer de Hudd hadd misse zieje odder wer ne graad uffgehadd hadd. Der war nämlich doomols de King. Wie zum Beispiel de Gessler, wo sogar verlangt hadd, dass mer vor seinem Hudd uff der Stang e Diener mache solld. Was awwer dann dem Tell iwwer die Hutschnur gang iss. Vumm alde Fritz odder vumm Napoleon stammt joo aach das scheene Lied: Mei Hudd der hadd drei Egge. Seit awwer die Monarchie abgeschaffd worr iss, versuche mir ganz demograadisch, die verschiedene Aansichde unner ääner Hudd se bringe. Indemm dass die Kandidaade bei de Wahle ihr Hudd in de Ring schmeise. Wann dann awwer ääner schlecht zielt unn der fallt emm denääwe in de Dregg, doo iss das dann e Baddsch-Kabb. Unn er muss sich aanheere: Ich glaab du bischd e bissje nääwe der Kabb. Die Bandbreide vunn Ardiggel fier uff de Kobb reicht joo vumm Aangewwer-Hudd bis zur Zibbelkabb. Besonnerschd imposand unn volumminöös iss in jedem Fall de sogenennde Kinschdler-Hudd. Warum das so iss, werrd emm klar, wammer uff dem Plakaad lääsd: Intridd frei, aanschließend Hudd-Sammlung.