In Dengmerd ware am vergangene Samschdaach joo widder mool die bildende Kinschdler ausgeschwärmt. Es Sümposium midd de Mooler aus der ganz Reeschioon hädd mer direggd kinne unner das Moddo stelle: Unser Stadt soll scheener werre. So inbrünsdisch hannse doo die moolerische Egge vunn Dengmerd uff die Leinwand gezauwert. Awwer mir hann joo schließlich in punkto Kunscht aach e gewisser Ruf se verteidische. Unn doo isses kää Wunner, dass e ganzes Kontingent sogar aus Fronkreich kumm iss, wo joo die Freiluftmoolerei eichendlich erfunn worr iss. Das nennt mer plein air unn doodruff reimt sich Dengmerder Flair. Manche fiehle sich schunn fascht wie dehemm, so wie zum Beispiel de Jean-Louis Schwartz aus Sarre-Union, der wo schon seit 30 Johr reeschelmääsisch hie bei uns sei Kunscht präsentiere duud. Unn es ware dann aach noch Kinschdler debei, wo ihre Werke in Stään gemeiselt hann. Was joo immer ebbes Sümboolisches aan sich hadd. Awwer es herausragendsde Werk in der Kategorie hann se ausgelaachert gehadd uff de Kreisel owwe an der Ensheimer Stroos. Doo stehder jedds, de einheimische Schutzpatroon, in Stään gehau. Vun weidem wirkt er joo ziemlich massief, awwer vun vorre hadder eejer e extrem sanftmiedischer Gesischtsausdrugg. Nur, fier denne se siehn, muss mer seerscht äämool ganz um de Kreisel erum. Wo se annerschdwo begehbare Kunschdwerke hinstelle, doo sinn die bei uns befahrbar. Awwer genau doo leid eventuell aach es Problem. De Ingobertus guggd nämlich ganz deitlich in Richdung Saarbrigge. Unn dreht doodebei seine Schäfcher de Rigge zu. Doo hann ich fier mich gedenkt, hoffendlich krien die Dengmerder das nidd in de falsche Hals. Vunn weeje der Sümbooligg.