Die Zuuchveschel hanns doo jedds äänfacher, die schwirre midd schrillem Schrei ab in de Süde. Awwer die Atzel iss joo kää Zuuchvochel, die iss e sogenennder Standvochel. Weil se standhaffd dehemm bleibt. Es äänzische was in dem Fall wegflieht, das iss die Kabb vumm Kobb. Die ganz bund Blädderpracht werrd vumm Wind vunn de Bääm geschiddelt. Unn dann uffem Boddem gleich nochmool midd lautstarkem Geblääse sesammegetrieb. Das iss dann die Johreszeit, wo ich zu meinem Freind Schorsch im Spass saan, er wär e Mann wie e Baam. Owwerum ganz kahl. Um die Johreszeit kumme aach allmählich die vierbäänische Hausgenosse widder rinn ins Warme. Statt drauserum se stroomere.

Zu dem Thema hann ich iwwrischens graad e kloori Meldung gelääs. E Katz als Haustier wirrd sich angeblich uff die Zufriedenhääd vunn der Hausfrau minneschdens so positief auswirke wie e Partner. Wahrscheins weil die Männer nidd so scheen schnurre. Die gehn liewer schnerre. Also wammer so ebbes lääst, doo sträuwe sich emm joo die Barthoor.
Bei de Männer allerdings, so hadds noch gehiesch, duud so e Kammertiecher nidd stimmungsuffhellend wirke. Ei das iss joo aach kää Wunner, die sinn wahrscheinlisch bloos neidisch. Awwer er kann sich joo am näägschde Wocheenn widder innschmeichele. Unn kaafd ihm ebbes in der Stadthall. E edler Stään fier sein Schmuggstigg.