Awwer mir sinn joo hie inn Dengmerd was leinwandmääsisch die Versorschung aanbelangt, aach noch reladief gudd draan. Mir hann zum Gligg noch e Kino, sogar in mehrere Eetaasche. Im Geejesatz zu annere vergleichbare Städd. Unn mir hann sogar e Kinowerkstatt, hinne in der Parrgass. Speziell fier die Cineeaschde, also die Filmliebhaber unn Kenner.

Dass sich die Kinos iwwerhaupt noch hann kinne halle geeje die Konkurrenz vum Fernsehn unn vunn de Videos, das leid wahrscheins an denne sogenennde Blogg-Baschder. Das sinn die Kasseschlaacher, wo die beriehmdeschde Stare Holliwutz middspiele. Unn doo isses Publikum ganz wild druff, weil mer die joo schunn aus der Zeidung odder aus de Promi-Sendunge im Fernsehn kennd. So kanns kumme.

Unn Videos sinn iwwrischens middlerweile schunn längschd Schnee vunn geschdern unn heegschdens noch uffem Speicher gebunkert. Es gebbd nämlich jedds vill dollere technische Neihääde unn sogar Filme, die wo mer sich ausem weltweide Netz uff sei Kommbjuuder erunnerlade kann. Mei Freind Schorsch hadd allerdings gemennd, so ebbes käm ihm nidd uff die Netzhaut. Doo hadder ganz recht, mei Fall wär das aach nidd.

Mer saad joo umgangssprachlich, im Kino doo laafd e Film unn doo brauchd der aach sei Auslauf unn de Zuschauer Platz, wo er sich mool hinflääze kann. Awwer wann ich dann siehn, dasses Leid gebbd, die wo sich so ebbes uffem Händi aangugge, doo kann ich nur saan: ich glaab ich bin im falsche Film.