Voorisch Wuch sinn joo bei der Stadt alde Fahrzeiche aus ihrem Fuhrpark unner de Hammer kumm, wie mir Fachleid saan. Es war awwer nidd desweeje, weil se die Rate nimmeh hann kinne bezahle, die Audos ware äänfach in die Johre kumm. Mool abgesiehn vum reine Materialwert hänge an soome Gerät joo aach Erinnerunge, wammers johrelang beniddsd hadd. Das iss fascht wie in rer Familje, wo mer sich aach anenanner gewehnt hadd. Wann de Klään dann gefrood werrd, wie alt sei Opa iss. Unn er saad: Ich wääs nidd, denne hammir schunn eewisch. Unn der hadd joo aach kää Kilomeederzähler, wo mer draan sieht, wie gudd er noch in Schuss iss.Was denne Dienschtwaan aangeht, doo hann awwer trotzdem kää Persone ausem effendliche Lääwe middgebodd. Bei so rer Versteicherung solle sich joo, wie de Noome schunn saad, die Bieter meeschlichst geejeseidisch hochschaukele. Dass am Enn aach ebbes in die Kass eninnkummt. Unn de Aukzionaator duud desweeje immer stiwwele: Wer bietet mehr? Awwer wammer sich geschiggd draanstellt, kammer bei der Geleeschenhääd es ään odder annere Schnäbbche mache. Desweeje saad mer joo aach vun dem, der wo das am Schluss midd hemm nemmt, er hädd de Zuschlaach kried. Unn in dem Fall vunn unserm Dengmerder Dienschtfahrzeich iss der noo Dudweiler vergebb worr. Das muss mer sich mool vorstelle, ins Preissische!. Doo spielt awwer dann de Prominendefaktor e Roll. Dass jemand saan kann, midd dem Audo wo ich fahre sinn aach schunn Owwerberjermääschdere kutschiert worr. Awwer es war noch imme tipp-topp Zustand. Unn dass iss joo dann aach e Kompliment fier die Vorbesitzer. Weil mer doodraan sieht, dass die sich midd de Dienschtreise schwäär serigg gehall hann.