Mer kanns scheins nidd jedem recht mache, schunn garnidd middem Wedder. Weil die Leid halt ganz verschieden gestriggd sinn.
Am beschde hubbsd mer bei so Temberaduure ins näägschdbeschde Gewässer fier sei verschwiddsder Korpus se kiehle. Noodemm dass mer ne meeschlichst groosflächisch vorher in die Sunn drapierd hadd. Awwer doo gebbds dann aach widder unnerschiedliche Inderesse, wie mer am Glashidderweijer in Rohrbach siehn kann. Mer kann nadierlich irjendwie verstehn, dass so e Gewässer midd rer groos Wies drummerumm im Summer die Freiluffd-Fänns anlogge duud. Annerseits iss es awwer aach verständlich, dass die Angler doo nidd so begeischderd sinn, wann in ihrem Revier so e uferloses Treiwe herrscht.
Wie die Fisch zum dem ganze stehn, hannse noch nidd gefrood. Awwer die hanns joo im Wasser sowieso scheen kiehl. Wann die, die wo doo unerlaubderweis drinnrum schwimme, sich vorher noch midd Sunne-Krääm ingerieb hann, doo kammer am Enn nur noch Ölsardine fange.
Bekanndlich iss es Bade dort desweeje amtlich verbodd. Unn es stehn sogar Schilder doo. Awwer midd de Schilder iss das so e Sach. Vielleicht hänge die se hoch unn mer kried e steifer Hals. Oder mer hadd zufällisch die Brill dehemm vergess. Odder es iss emm schnurzpiepegal. Weils joo sowieso nidd kontrolliert werrd. Das sieht mer aach an denne Kolonne vunn Falschparker an der Stroos. Awwer das sinn meischd Auswärdische, wo geheerd hann wie scheens doo iss – in Bad Rohrbach.