Wann sie heid die doo Atzel lääse unn sie es groose Gähne iwwerkummt, doo leid das hoffendlich nidd unbedingt an dem Ardiggel. Heid iss nämlich offizijell der Tag des Schlafes. Falls se sich doodefier interessiere unn der Daach ihre Neichunge entgeejekummt, kinne se im Internet noogugge. Doo steht das unner der Rubrigg Akzioonsdaache. Das muss mer sich mool vorstelle: schloofe unn Akzioone! Wer denkt sich dann so ebbes aus. Was menne dann die, was ich an dem Schloofdaach fier groosardische Akzioone starte duun. Ei doo lee ich mich in die Feddere. Mer saad joo aach vunn jemand wo schreibt, er wär ein Mann der Feder. Unn desweeje hääscht logischerweis de Verein, wo die ganze Autore drinn sinn, de Penn-Club. Jedenfalls hann ich zu meinem gesaad: Wegg mich, wann der ganze Truuwel vorbei iss. Allerdings muss mer uffpasse, dassmer das nidd groos erumm verzählt. Midd der Instellung, ich wollt ich wär e Debbisch, doo kinnd ich de ganze Daach leije bleiwe, kammer sich gesellschaftlich leicht ins Abseits manövriere. Doo werrd mer dann gääre als Schloofmidds odder Langschläfer verschull, was in der Beliebheitsskala noch hinnerm Warmduscher rangiert. Ganz im Geejesadds zu denne dünaamische unn hüpperaktive Zeitgenosse, wo als ausgeschloofene Type bewunnert werre. Annererseits brauche awwer die Leid nadierlich aach ihr Scheenhäädsschloof, wannse nidd wie inngeschloofene Fies durch die Geeschend laafe wolle. Unn komischerweis gilt das dann widder als moralisch hochwerdisch, wammer sich oowens schunn beizeide ins Bedd leed. Wammer midd de Hiehner schloofe geht, wie mer so scheen saad. Awwer glaawe se nur nidd, dass ich doo jedds noch e Kommentar dezu abgewwe.