Als neijeschdes iss geplant, dass mei Geld so arrogant iss, dasses mich nimmool meh anguggd, bevors sichs vunn mir veranscheide duud. E sogenennder Wertschafts-Weiser hadd gefordert, mer sollde es Bargeld ganz abschaffe. De Volksmund saad allerdings: Nur Bares iss Wahres. Awwer wer simmir dann, dass mir soome Fachmann in seiner unendliche Weishääd widerspreche derfde. Eichendlich wärs nur konsequent, wanns kää Bargeld meh gääb. Weil de greeschde Dääl vunn dem Geld, was hie erummschwirrt sowieso nur virtuelles, also scheinbares Geld iss. Es meischde iss nämlich uff Pump. Desweeje schwäddsd mer bei greesere Ausgabe aach vunn Un-Summe. Unn es Geld, wo eichendlich garnidd doo iss, werrd dann vun denne besagte Fachleid in reales Geld verwannelt. Wie durch ökonomischi Magie. Iwwrischens ware die Weise ausem Morgenland im Hauptberuf aach Magiere. In der Praxis gääbs ohne Minz unn Scheine allerdings noch e paar Probleme: Wann de Klään e Bällje Eis uff die Hand will, doo brauchder erscht die Inzuuchsermächdischung vunn seinem Babbe. Unn wann die Oma ihm mool e Scheinche zustegge will, doo saadse: Mei Knechdche, es duud mer lääd, awwer mei Kombjuuder streikt graad. Unn vunn weeje Kriminalitäädsbekämpfung: Die Gängschdere freije sich, dasse nimmeh de Huddel middem Abtransport hann. Woos doch iwwer die Eleggdroonigg vunn dehemm aus geht. Awwer wie hääschds in dem alde Börsespruch: Ihr Geld iss nidd fort, das hadd jedds bloos jemand anneres.